Shkruan: Selam Shkodra
Konfliktet ushtarake në Lindjen e Mesme kanë qenë ndër faktorët më të rëndësishëm që kanë formësuar rendin e sigurisë ndërkombëtare pas Luftës së ftohtë. Një nga momentet kyçe ishte lufta e Golfit, e cila u zhvillua pas pushtimit të Kuvajtit nga Iraku dhe ndërhyrjes së një koalicioni të gjerë ndërkombëtar të udhëhequr nga SHBA-të dhe 35 vende tjera.
Në dekadat pas kësaj lufte, dinamika e sigurisë në rajon ka evoluar ndjeshëm. Përplasja aktuale që përfshin Izrael-SHBA me Iranin përfaqëson një model të ri të konfliktit modern, ku përveç forcave konvencionale përdoren edhe raketa balistike, dronë dhe rrjete të aktorëve jo-shtetërorë.
në këtë shkrim synoj të krahasojë strukturën strategjike të këtyre dy konflikteve, duke shqyrtuar koalicionet ushtarake, balancën e forcave, avantazhet dhe dobësitë e palëve, si dhe ndikimin e teknologjisë moderne në zhvillimin e luftës.
Konteksti gjeopolitik dhe shkaqet e konflikteve
Shkaku kryesor i kuftës së Golfit ishte pushtimi i Kuvatit nga Iraku, një veprim që u konsiderua shkelje e rëndë e rendit ndërkombëtar. Reagimi i komunitetit ndërkombëtar ishte i shpejtë dhe rezultoi në krijimin e një koalicioni shumëkombësh për ta detyruar Irakun të tërhiqej. Objektivi strategjik ishte i qartë rikthimi i sovranitetit të Kuvajtit dhe dobësimi i potencialit ushtarak të Irakut.
Në konfliktin aktual, dinamika është më e ndërlikuar. Përplasja midis Izraelit dhe Iranit është rezultat i rivalitetit të gjatë gjeopolitik dhe ideologjik në rajon. Përfshirja e Amerikes lidhet me interesat strategjike të saj për të ruajtur balancën e fuqisë dhe për të mbrojtur aleatët në Lindjen e Mesme.
Struktura e koalicioneve ushtarake
Një nga dallimet më të mëdha midis dy konflikteve është natyra e koalicioneve ushtarake. Në luftën e Gjirit, SHBA arriti të krijojë një koalicion të gjerë ndërkombëtar që përfshinte shtete perëndimore dhe arabe si Britania e madhe, Franca, Arabia Saudite, Egjipti dhe Siria. Kjo e bëri operacionin ushtarak jo vetëm një ndërhyrje të fuqishme, por edhe një veprim me legjitimitet të gjerë ndërkombëtar.
Në konfliktin aktual, struktura e aleancave është shumë më e fragmentuar. Blloku kryesor përbëhet nga SHBA dhe Izraeli, ndërsa Irani mbështetet në një rrjet aleatësh dhe milicish rajonale, përfshirë Hezbollah dhe grupe të tjera në Irak, Siri, Liban dhe Yemen.
Balanca e forcave dhe teknologjia ushtarake
Në Luftën e Gjirit, epërsia teknologjike e koalicionit ishte vendimtare. Avionët modernë dhe sistemet e armëve precize i dhanë mundësi forcave të koalicionit të shkatërronin shpejt infrastrukturën ushtarake të Irakut. Ndërkohë, Iraku përdorte raketa të tipit Scud, të cilat kishin saktësi të kufizuar dhe efekt strategjik relativisht të vogël.
Në konfliktin aktual teknologjia ka evoluar ndjeshëm. SHBA dhe Izraeli përdorin avionë stealth si F-35 Lightning II, ndërsa Iran ka zhvilluar një arsenal të madh raketash balistike dhe dronësh, përfshirë sisteme si Shahed-136. Kjo krijon një model të ri të luftës moderne ku armët me kosto të ulët, si dronët, mund të sfidojnë sistemet tradicionale të mbrojtjes.
Avantazhet dhe dobësitë strategjike
Në vitin 1991 koalicioni kishte avantazh të qartë në teknologji, koordinim dhe logjistikë. Ushtria e Irakut, megjithëse e madhe, vuante nga pajisjet e vjetra dhe nga një strukturë komanduese e centralizuar që e kufizonte fleksibilitetin në fushën e betejës.
Në konfliktin aktual, avantazhi teknologjik mbetet në anën e SHBA-së dhe Izraelit, ndërsa Irani mbështetet në strategji asimetrike dhe në përdorimin e raketave dhe dronëve për të kompensuar inferioritetin ajror. Një faktor tjetër strategjik është kontrolli i korridoreve të energjisë, veçanërisht ngushtica e Hormuzit, ku kalon një pjesë e madhe e tregtisë globale të naftës. Dallimet në natyrën e luftës, Lufta e parë e Gjirit ishte një konflikt relativisht i shkurtër dhe i përqendruar në një front të vetëm. Operacionet ushtarake u zhvilluan kryesisht në territorin e Kuvajtit dhe Irakut, dhe rezultati u arrit në një periudhë të shkurtër kohore. Në të kundërt, konflikti aktual është shumë më i shpërndarë dhe përfshin disa fronte rajonale. Ai përfshin jo vetëm shtete, por edhe aktorë jo-shtetërorë dhe teknologji të reja të luftës. Kjo e bën konfliktin më të paparashikueshëm dhe potencialisht më të gjatë.
Nese e shohim në mënyrë krahasuese tregon se lufta e Golfit përfaqësonte një model klasik të luftës konvencionale ku një koalicion i madh ndërkombëtar mundi shpejt një kundërshtar të izoluar. Në të kundërt, konflikti aktual që përfshin Izrael, SHBA dhe Iran është shumë më kompleks dhe përfshin elementë të luftës hibride, teknologji të avancuara dhe rrjete rajonale aleatësh.
Për këto arsye, shumë studiues të sigurisë ndërkombëtare argumentojnë se një përshkallëzim i plotë i konfliktit aktual mund të ketë pasoja shumë më të gjera për stabilitetin rajonal dhe për ekonominë globale sesa Lufta e Gjirit.
Opinioni përmban pikëpamjet e autorit dhe nuk prezanton qëndrimet editoriale të teve1.info
