Komisioni Qendror i Zgjedhjeve (KQZ) ka vendosur që periudha zyrtare e fushatës zgjedhore për zgjedhjet e parakohshme parlamentare të 7 qershorit të zgjasë 10 ditë e 7 orë, duke filluar më 28 maj dhe duke përfunduar më 7 qershor në orën 06:59.
Në mbledhjen e mbajtur sot, KQZ miratoi planin e aktiviteteve për organizimin e zgjedhjeve, duke përfshirë të gjitha fazat e procesit: nga deklarimi i partive politike dhe formimi i koalicioneve, deri te dorëzimi i listave të kandidatëve dhe akreditimi i vëzhguesve dhe mediave.
“Deklarimi i partive për pjesëmarrje ose mospjesëmarrje dhe formimin e koalicioneve bëhet nga 1 maj deri më 7 maj. Aplikimi për certifikim të subjekteve politike zhvillohet nga 2 maj deri më 10 maj, ndërsa dorëzimi i listave të kandidatëve bëhet nga 2 maj deri më 12 maj,” tha KQZ.
Komisioni gjithashtu ka vendosur datat për certifikimin e subjekteve politike dhe kandidatëve, shortin për renditjen në fletëvotim, si dhe periudhat për regjistrimin dhe votimin e qytetarëve brenda dhe jashtë vendit.
“Regjistrimi i votuesve jashtë Kosovës zhvillohet nga 6 maj deri më 17 maj, ndërsa votimi përmes postës mbahet nga 25 maj deri më 6 qershor. Votimi në përfaqësi diplomatike do të mbahet më 6 qershor nga ora 07:00 deri 19:00. Brenda vendit, periudha për korrigjimin e listës së votuesve është nga 6 maj deri më 18 maj,” shtuan nga KQZ.
Dita e zgjedhjeve është caktuar më 7 qershor 2026, me orar votimi nga 07:00 deri 19:00.
