Komisioni Qendror i Zgjedhjeve ka miratuar sot planin për organizimin e procesit të votimit jashtë vendit për zgjedhjet e parakohshme parlamentare të 28 dhjetorit 2025.
Sipas vendimit, votimi pritet të zhvillohet në 50 përfaqësi diplomatike, me gjithsej 66 vendvotime të shpërndara në 36 shtete.
Megjithatë, ky numër mund të ndryshojë në varësi të numrit të votuesve që do të regjistrohen.
KQZ ka caktuar që deri në 950 votues mund të regjistrohen për të votuar në një vendvotim brenda përfaqësive diplomatike, ndërsa numri maksimal i përgjithshëm i votuesve që mund të regjistrohen në këto qendra arrin në 62 mijë e 700.
Përveç hapësirave diplomatike, Qendra të Votimit do të hapen edhe në lokacione shtesë, jashtë përfaqësive zyrtare, me propozim të Ministrisë së Punëve të Jashtme dhe Diasporës.
Këto lokacione përfshijnë 10 qendra shtesë (5 në Gjermani, 3 në Zvicër, 1 në Mbretërinë e Bashkuar dhe 1 në SHBA), me gjithsej 43 vendvotime, ku mund të regjistrohen deri në 40,850 votues.
Në mbledhje u prezantua edhe Lista Preliminare e Votuesve, e cila përmban 2,076,422 qytetarë me të drejtë vote.
Prej tyre, 1,067,499 janë burra dhe 1,008,923 gra. Lista aktuale ka 7,324 votues më shumë sesa në zgjedhjet lokale të 12 tetorit 2025.
KQZ miratoi gjithashtu sloganin zyrtar të fushatës informuese për këto zgjedhje: “KOSOVA VOTON!”
Mbledhja u shoqërua me debat mes anëtarëve të KQZ-së lidhur me mënyrën e organizimit të qendrave të votimit në diasporë.
Përfaqësuesi i Lëvizjes Vetëvendosje, Alban Krasniqi, kritikoi qasjen e këshillit për operacione zgjedhore, duke e cilësuar procesin si “pamundësim të votimit të mërgatës”.
Ai tha se disa qendra që plotësojnë kriteret teknike po rrezikohen të mbyllen padrejtësisht.
Ndërkohë, anëtari i PDK-së, Ilir Gashi, theksoi se hapja e qendrave jashtë përfaqësive diplomatike përbën shkelje të ligjit, duke akuzuar MPJ-në për “ndërhyrje flagrante” në proces.
Kryesuesi i KQZ-së, Kreshnik Radoniqi, pranoi se afati i shkurtër kohor mund të paraqesë vështirësi serioze në organizimin e votimit në diasporë, duke theksuar se edhe dërgimi i materialeve zgjedhore në të gjitha ambasadat mund të jetë i pamundur.
Ai tha se do të tentohet realizimi i planit, por rreziku mbetet i lartë.
Zgjedhjet parlamentare në Kosovë do të mbahen më 28 dhjetor 2025.
