Nga 1 janari i këtij viti, energjia elektrike e shpenzuar në katër komunat veriore do të paguhet njësoj si në pjesët tjera të vendit.
Këtë e ka bërë të ditur kryeshefi i operatorit të Sistemit, Transmisionit dhe Tregut të Energjisë Elektrike në Kosovë (KOSTT), Evetar Zeqiri.
Ai në Facebook ka shkruar se furnizuesi Elektrosever ka filluar të marrë përgjegjësinë për konsumin e energjisë në veri.
“Me 1 janar 2024, duke filluar nga 00:01’, furnizuesi Elektrosever Sh.p.k, -kompani e licensuar dhe e regjistruar sipas ligjeve të Republikës së Kosovës -ka filluar të nominoj energjinë për katër komunat e veriut. Pra ka filluar të marrë përgjegjësinë për konsumin e energjisë në veri. Pas më shumë se 20 viteve, energjia e konsumuar në pjesën veriore do të paguhet njësoj sikurse në pjesën tjetër të territorit të vendit”, ka shkruar ai në Facebook.
Zeqiri këtij postimi i ka shtuar dy fotografi, ku tregohet periudha rreth 1 orë para ndërrimit të motmoteve dhe një tjetër disa minuta pas fillimit të nominimit, ku sipas tij, vërehen ndryshimet.
“Fotografia e parë (në të majtë) tregon periudhën rreth 1 orë para orës 12:00h, para fillimit të nominimit. Ndërsa fotografia e dytë (në të djathtë) tregon kohën diku rreth 6 minuta pas fillimit të nominimit. Vërehet menjëherë një nivel i devijimeve të pa qëllimshme dukshëm më i ulët, pra afër zero”, ka thënë ai.
20 vjet pas luftës, energjia e shpenzuar në veri nuk është paguar nga banorët e katër komunave me shumicë serbe.
Kosova dhe Serbia kishin nënshkruar marrëveshje për energjinë, por deri më tash nuk ishte zbatuar.
