Kombëtarja e Kosovës në futboll, ka regjistruar një tjetër arritje të madhe në ranglistën e FIFA-s, të publikuar për muajin nëntor.
Këtë herë, Kosova zë vendin e 80-të, më të lartin që nga pranimi në FIFA, duke grumbulluar 1308 pikë.
Kjo ngjitje ka ardhur pas fitores 2:0 me Slloveninë dhe barazimit 1:1 me Zvicrën në kuadër të kualifikimeve për Botërorin 2026, ku ka siguruar pozitën e dytë në grup dhe pjesëmarrjen në “play-off” për herë të parë në histori.
Muajin e shkuar, Kosova u ngjit për shtatë pozita në këtë ranglistë dhe ishte e 84-ta me 1285 pikë të tubuara.
Për dallim prej Kosovës që është ngritur, Kombëtarja e Shqipërisë ka pësuar rënie në ranglistën e re të FIFA-s.
Shqipëria ka rënë për dy pozita dhe tani zë vendin e 63-të me 1401 pikë, sa i kishte edhe muajin e shkuar ku renditej e 61-ta.
Ranglistës i prinë Spanja, e ndjekur nga Argjentina, Franca, Anglia dhe Brazili, kombëtare që janë në top-5 më të ranguarat.
