Kombëtarja e Kosovës në futboll ka përparuar për tri pozita në ranglistën e re të FIFA-s, të cilën shtëpia e futbollit botëror e ka publikuar të enjten.
Fitorja ndaj Lituanisë dhe Qipros në fillim të këtij muaji në Ligën e Kombeve, mundësuan ngritjen e Kosovës në pozitën e 101-të me 1218 pikë.
“Dardanët” në ranglistën e re, kanë 13 pikë më shumë sesa në ranglistën e shkuar, në të cilën janë renditur në pozitën e 104-të.
Renditja në pozitën 101 është më e mirë që e ka arritur Kosova që nga pranimi në UEFA dhe FIFA.
Në fakt, është në nëntorin e vitit 2023, Kosova ishte renditur në pozitën e njëjtë që është tani.
Krahas Kosovës, edhe Kombëtarja e Shqipërisë ka përparuar në ranglistën e re të FIFA-s.
Shqipëria është ngritur nga pozita e 67-të në të 65-ën dhe tani ka 1379 pikë, dy më shumë sesa në ranglistën e kaluar.
Këtë muaj, Shqipëria u mposht nga Çekia dhe fitoi ndaj Gjeorgjisë në kuadër të Ligës së Kombeve.
Ndërkohë, sa i përket 10-të pozitave të para të ranglistës së FIFA-s, ato nuk kanë ndryshuar.
Argjentina mbetet e para, e ndjekur nga Franca, Spanja, Anglia, Brazili, Belgjika, Portugalia, Holanda, Italia dhe Kolumbia, e cila e mbyll top-dhjetëshen.
