Kosova aktualisht renditet e 13-ta në tabelën e vendeve më të suksesshme në Lojërat Mesdhetare “Oran 2022”. Kosova deri të mërkurën nuk ishte fare në listë, ndërsa tani mban pozitën e 13-të. Kjo falë pesë medaljeve të fituara deri më tani. Katër prej medaljeve janë fituar në xhudo e një në boks. Medalje të arta kanë xhudistet Distria Krasniqi e Laura Fazliu, ndërsa medalje të bronzta kanë xhudistët Akil Gjakova e Flaka Loxha, si dhe boksieri Shpejtim Bajoku.
Kosova ka kaluar në renditje vende si Portugalia, Sllovenia, Shqipëria, Maqedonia e Veriut, Monako, Maroku, Mali i Zi, Malta, Bosnjë-Hercegovina e Libia. 23 vende kanë fituar medalje deri më tani.
Ka shpresa që Kosova të fitoi edhe një apo dy medalje të premten. Natyrisht në xhudo. Nëse pritjet realizohen, atëherë Kosova mund të avancoi për ndonjë pozitë.
Turqia është më e mira deri më tani me 21 medalje të arta dhe 48 gjithsej. Italia është e dyta me 12 medalje të arta dhe 54 gjithsej. Algjeria renditet e treta me nëntë të arit dhe 22 medalje gjithsej. Nga dy të arta i kanë edhe San Marino e Qipro.
