Komiteti Olimpik i Kosovës me krenari ka konfirmuar se Kosova momentalisht ka siguruar gjashtë norma olimpike për Olimpiadën e këtij viti që mbahet në Paris.
KOK-u, të martën ka bërë të ditur se pesë prej këtyre gjashtë normave olimpike janë nga xhudo, bazuar në renditjen përfundimtare olimpike të publikuar nga Federata Ndërkombëtare e Xhudos.
Bazuar në këtë renditje, Distria Krasniqi dhe Laura Fazliu do të udhëtojnë drejt Parisit, si e dyta, përkatësisht e treta në kategorinë përkatëse. Po ashtu, të kualifikuar për këtë ngjarje të madhe sportive janë edhe Nora Gjakova, Loriana Kuka e Akil Gjakova.
“Kemi kënaqësinë e jashtëzakonshme të ju prezantojmë pesë normat olimpike nga sporti i vetëm me medalje olimpike, xhudo. Mirënjohje të thellë për kontribuuesin më të madh në këtë drejtim, kryemjeshtrin Driton Kuka”, thuhet në postimin e KOK-ut në Facebook.
Normën e gjashtë olimpike për Kosovën dhe pjesëmarrjen në Olimpiadën e këtij viti e ka siguruar edhe boksierja Donjeta Sadiku.
