Përfaqësuesja e Kosovës në basketboll do t’i luajë në palestrën “Sezai Surroi” në Prizren, ndeshjet si mikpritëse në kuadër të parakualifikimeve për “Eurobasket 2025”.
Kosova prej datës 19 korrik deri më datën 5 gusht, do t’i luajë katër ndeshje në kuadër të Grupit H.
Prej katër ndeshjeve, Kosova do t’i luajë dy në shtëpi dhe dy në udhëtim.
Më 19 korrik, Kosova e luan ndeshjen e parë në kuadër të parakualifikimeve në shtëpi, ku do të përballet me Zvicrën. Ndërkohë, më 5 gusht do të përballet me Danimarkën, po ashtu në Prizren.
“Ndeshjet si vendas basketbollistët e Kosovës për herë të parë do t’i luajnë në qytetin e Prizrenit, ku më 19 korrik e presin Zvicrën, ndërsa më 5 gusht janë nikoqirë të Danimarkës”, thuhet në njoftimin e FBK-së.
Javë më parë, palestra “Sezai Surroi” në Prizren është rinovuar tërësisht dhe e gatshme për të pritur ndeshjet e “Dardanëve”.
