Kosova ka zgjeruar hartën e saj ajrore me dy destinacione të reja ndërkombëtare, pas inaugurimit zyrtar të linjave direkte nga Prishtina drejt Parisit dhe Lyonit, të operuara nga kompania ajrore ASL Airlines.
Kjo nismë u vlerësua si një hap i rëndësishëm për përmirësimin e lidhjeve ajrore të vendit, lehtësimin e lëvizjes së udhëtarëve dhe fuqizimin e marrëdhënieve ekonomike e turistike me Francën dhe vendet e tjera evropiane.
Në ceremoninë zyrtare të mbajtur në Aeroportin Ndërkombëtar të Prishtinës, zëvendësministri në detyrë i Mjedisit, Planifikimit Hapësinor dhe Infrastrukturës, Jeton Raka, theksoi rëndësinë e investimeve strategjike në sektorin ajror:
“Ky zhvillim është dëshmi e përkushtimit të institucioneve për modernizimin dhe avancimin e infrastrukturës ajrore në Kosovë. Përmes investimeve prej mbi 33 milionë euro janë arritur përmirësime të dukshme: zgjatja e pistës, sistemi më i avancuar i aterimit (ILS CAT IIIb), rritja e numrit të pasagjerëve dhe fluturimeve, si dhe ulja e çmimeve të biletave.”
Ngjarja u pasurua me pjesëmarrjen e drejtorit ekzekutiv të Aeroportit, Gökhan Acikgöz, drejtorit komercial të ASL Airlines, Bruno Besnehard, ambasadorit të Francës në Kosovë, Olivier Guérot, dhe ambasadorit të Kosovës në Francë, Mehdi Halimi, duke shënuar një moment të rëndësishëm të bashkëpunimit ndërinstitucional dhe ndërkombëtar.
Hapja e këtyre linjave pritet të sjellë rritje të qarkullimit të pasagjerëve, zhvillim të turizmit dhe rritje të lidhjeve ekonomike mes Kosovës dhe Francës.
