Sot, më 2 janar, Kosova do t’i japë lamtumirën e fundit akademikut dhe ish-kryetarit të parë të Kuvendit të Kosovës, Nexhat Daci, përmes ceremonive shtetërore.
Homazhet dhe Akademia Përkujtimore do të mbahen në ambientet e Kuvendit të Kosovës, ndërsa varrimi do të zhvillohet në Varrezat e Arbërisë.
Sipas agjendës zyrtare të publikuar nga e bija e tij, Edi Daci Prapashtica, ceremonitë mortore do të zhvillohen sipas këtij orari: nga ora 09:00 deri në 11:45 do të mbahen homazhe në hollin e Kuvendit të Kosovës; nga ora 12:00 deri në 12:45 do të mbahet Akademia Përkujtimore në Sallën Plenare; ndërsa varrimi me nderime shtetërore do të bëhet nga ora 13:40 deri në 14:20 në Varrezat e lagjes Arbëria.
E pamja për akademikun Daci do të mbahet nga 3 deri më 5 janar, në Hotel “Sirius”, nga ora 10:00 deri në 17:00.
“Familja Daci falënderon të gjithë qytetarët, miqtë dhe dashamirët për ngushëllimet dhe respektin e treguar në këto momente zie”, ka shkruar Edi Daci Prapashtica në rrjetet sociale.
Ndryshe, akademiku Nexhat Daci ka ndërruar jetë në moshën 81-vjeçare.
Ai ishte kimist, profesor universitar dhe akademik i shquar.
Daci shërbeu si deputet i Kuvendit të Kosovës nga viti 2001 deri në vitin 2011 dhe mbajti postin e kryetarit të Kuvendit nga viti 2001 deri në vitin 2006.
Gjithashtu, ai ka udhëhequr Akademinë e Shkencave dhe Arteve të Kosovës (ASHAK) dhe ka qenë aktiv në jetën politike dhe institucionale të vendit, përfshirë themelimin e Lidhjes Demokratike të Dardanisë (LDD) në vitin 2007.
