Çdo maunë që vjen me mallra nga Shtetet e Bashkuara të Amerikës në Kosovë, tani e tutje nuk do të ketë asnjë tarifa doganore.
Kjo pasi që në mbledhjen e qeverisë në detyrë, kryeministri në detyrë Albin Kurti mori vendim të largohet 10%-shi i taksës për produktet amerikane.
Kurti tha ky vendim tregon marrëdhëniet shumë të mira që Kosova ka me SHBA-të.
“Tjetër vendim shumë të rëndësishëm që po marrim sot është largimi i tarifës doganore me Shtetet e Bashkuara të Amerikës. Kështu tani e tutje të gjitha produktet me origjinë nga SHBA-të do të kenë tarifë zero për qind kur të hyjnë në vendin tonë. Kosova i mirëpret produktet amerikane në tregun e saj dhe besojmë fuqishëm që kjo të ndikojë në rritjen e këmbimit tregtar si dhe shtimin e investimeve. Ky është një hap i radhës që dëshmon për marrëdhëniet shumë të mira ndërmjet dy vendeve tona dhe njëkohësisht tregon përkushtimin dhe vendosmërinë tonë për të pasur një marrëveshje për tregti të lirë me ShBA-të”, u shpreh Kurti.
E për këtë vendim, ka reaguar edhe presidentja e vendit, Vjosa Osmani e cila ka thënë se ndihet krenare që Kosova është vendi i parë që ka propozuar heqjen e barrierave ndaj aleatit tonë strategjik.
Edhe kryediplomatja në detyrë, Donika Gërvalla ka thënë që Marrëdhëniet me Shtetet e Bashkuara të Amerikës kanë arritur një transformim substancial.
Vendimin e ka përshëndetur edhe Oda Ekonomike e Kosovës.
Por Kryetari, Lulzim Rafuna tha për Tëvë1 se një vendim i tillë ka qenë dashur të merret qysh më herët.
“Është i mirëseardhur edhe pse pak i vonë se ne kemi kërkuar qysh në fillim të vitit mirëpo më mirë vonë se hiç, është i mirëseardhur një vendim i cili do të ndihmoj në shkëmbimin tregtar mes Shteteve të Bashkuara të Amerikës dhe Kosovës, do t’i motivoj investimet amerikane në Kosovë. Për më shumë kjo tregon edhe një partner të besueshëm një partner tonin që kemi me SHBA-të. Si Odë Ekonomike kërkojmë që të mos ndalen vetëm me këtë vendim”, tha Rafuna
Edhe Oda Amerikane në Kosovë e ka mirëpritur këtë vendim.
