Korrupsion në qeveri dhe mosndëshkueshmëri të tyre, janë disa nga çështjet e theksuara në raportin e Departamentit Amerikan të Shtetit. Kjo po shihet se Kosovës i jep një imazh të keq.
Në një tjetër raport ndërkombëtar, korrupsioni brenda qeverisë zuri vend.
Kësaj radhe, raporti i Departamentit Amerikan të Shtetit, theksin e vuri tek qeveritarët që lidhen me korrupsionin dhe mosndëshkueshmërinë e tyre as nga ligji, e as nga politika.
Ligji parashikonte dënime penale për korrupsion nga zyrtarët, por qeveria nuk e zbatoi ligjin në mënyrë efektive. Pati raportime të shumta për korrupsion në qeveri. Zyrtarët ndonjëherë përfshiheshin në praktika korruptive pa u ndëshkuar. Mungesa e mbikëqyrjes efektive gjyqësore dhe dobësia e përgjithshme në sundimin e ligjit kontribuan në këtë problem. Rastet e korrupsionit i nënshtroheshin rregullisht apelimeve të përsëritura dhe sistemi gjyqësor shpesh lejonte skadimin e parashkrimit.
Të pritshme këto të gjetura vlerësohen nga njohës të drejtësisë, bazuar nga gjendja në teren.
Megjithatë, kjo llogaritet t’i kushtojë Kosovës me shpërfaqjen e një imazhi jo të mirë.
“Disa ministra të qeverisë që janë ballafaquar me hetime dhe akuza për kryrerjen e veprave penale të ndryshme të korrupsionit. Por ata vazhdojnë ta mbajnë detyrën e tyre, funksionin e ministrit. Dhe ne kemi vërejtur që qeveria nuk ka marrë asnjë masë ndaj tyre, qoftë t’i pezullojë apo shkarkojë nga funksioni i minisitrit, përderisa procesi gjyqësor apo hetimet të përfundojnë. Kjo normalisht i jep një imazh të keq Kosovës, dhe reflekton, jo vetëm në raport të DASh-it”, tha Vullnet Bugaqku nga KDI.
Në raportin e DASh-it, është cekur edhe presioni i politikanëve dhe grupeve kriminale ndaj gazetarëve.
Sipas raportit, disa gazetarë u përmbajtën nga raportimi investigativ për shkak të frikës për sigurinë e tyre fizike ose sigurinë e punës.
Tutje, thuhet se gazetarët herë pas here merrnin oferta për përfitime financiare në këmbim të raportimit pozitiv ose braktisjes së një hetimi.