Kori nga Kosova “Siparantum Choir” ka performuar në një nga sallat më të njohura të muzikës botërore, në Filarmoninë e Berlinit në Gjermani.
Kjo u bë e ditur nga ambasadori i Kosovës në Gjermani, Faruk Ajeti, e që i cili ka shkruar se kjo është një ëndërr që u bë realitet pikërisht në 15-vjetorin e Pavarësisë së Republikës së Kosovës.
“Një premierë, një performancë mbresëlënëse, një mbrëmje e veçantë e muzikës tonë në një nga sallat më të njohura të muzikës botërore – atë të Filharmonisë së Berlinit. Kënaqësi e veçantë që së bashku me korin e mirënjohur nga Kosova, Siparantum Choir, nën drejtimin e Memli Kelmendi, organizuam atë që ndoshta para ca vitesh ishte vetëm një ëndërr dhe tani për jubileum e 15-vjetorit të Pavarësisë së Republikës së Kosovës 🇽🇰, është tashmë realitet. Me një program të veçantë artistik nga dirigjenti i mirënjohur Memli Kelmendi, u interpretuan këngë të ndryshme me motive shqiptare. Një kor model, i cili mbrapa vetës lë një rrugëtim të veçantë dhe me plotë sakrifica, e tani është bartës i disa çmimeve ndërkombëtare të muzikës korale”, ka shkruar Ajeti në Facebook.
Njëherit, Ajeti ka shkruar se performanca e tyre, ishte vetëm një pjesë e vogël e asaj çfarë ofron vendi, kultura dhe arti në Kosovë.
“Andaj, të përkushtuar si asnjëherë më parë vazhdojmë të jemi të fokusuar ndaj fuqizimit të diplomacisë kulturore të Republikës tonë. Një falënderim i veçantë i dedikohet edhe Gent Lazri dhe ekipit të tij CHORALSPACE – International Academy for Choral Arts për bashkëorganizimin, si pjesë përbërëse e kalendarit tonë kulturor”, thuhet tutje në postimin e tij./teve1.info/.
