Një qytetar me inicialet F.V. është arrestuar dhe dërguar në ndalim policor për 48 orë, pasi i njëjti dyshohet se ka kontrabanduar lopë nga Serbia në Kosovë, raporton teve1.info
Sipas komunikatës së Policisë së Kosovës, 54 vjeçai është arrestuar në brezin kufitar “Zona e Karaçevës” dhe është i dyshuar për veprën penale “kontrabandim me mallra”.
“Policia e Kosovës, Drejtoria për Hetimin e Krimeve Ekonomike dhe Korrupsionit, sektori në Gjilan(DHKEK), në bashkëpunim me Prokurorinë Themelore të Gjilanit, pas veprimeve hetimore, sot më datë 27.02.2023, ka arrestuar të dyshuarin F.V., (1969), nën dyshimin për kryerjen e veprës penale ‘kontrabandim me mallra’.
I dyshuari në periudhën kohore 2019-2020, dyshohet se ka qenë i përfshirë në aktivitetin e kontrabandimit të mallrave, konkretisht transportimin ilegal të gjedheve nga Republika e Serbisë në Republikën e Kosovës, nëpërmjet brezit kufitar (zona e Karaçevës), duke vepruar në kundërshtim me ligjet në fuqi”, thuhet në njoftimin e Policisë.
I dyshuari, i shoqëruar nga avokati i tij mbrojtës është intervistuar në NJHRKEK në Gjilan, në cilësinë e të dyshuarit, ku ka pranuar veprën penale për të cilën ngarkohej.
Me aktvendim të Prokurorisë Themelore në Gjilan, i dyshuari është ndaluar për 48 orë.
