Kryetari i Kuvendit të Kosovës, Glauk Konjufca ka reaguar për vrasjen e policit Afrim Bunjakut, i cili është vrarë të dielën nga grupi i armatosur serb.
Ai në një postim në Facebook, ka shprehur ngushëllimet më të sinqerta në emër të Kuvendit të Republikës së Kosovës dhe në emrin e tij.
Konjufca, u ka drejtuar familjarëve të ndjerit, duke thënë se vdekja e rreshter Afrimit është një humbje e madhe për familjen dhe Policinë e Kosovës, por edhe për mbarë popullin dhe institucionet e shtetit tonë.
“Rreshter Afrimi ra në krye të detyrës së shenjtë për ruajtjen e rendit dhe ligjit dhe vendosjen e kushtetutshmërisë në tërë territorin e Republikës së Kosovës, duke dhënë shembullin e profesionalizmit të lartë, guximit të pashoq, atdhedashurisë dhe sakrificës së jashtëzakonshme. Do të kujtohet përherë përkushtimi i tij në shërbim të qytetarëve dhe vepra e lavdishme në mbrojtje të Republikës”, ka shkruar Konjufca.
