Kryetari i Kuvendit të Kosovës, Glauk Konjufca, ka thënë se roli i Gjermanisë në procesin e dialogut Kosovë – Serbi është shumë i rëndësishëm.
Ai ka vlerësuar kontributin e këtij shteti që ka dhënë deri më tash në këtë proces, duke kërkuar që angazhimi i Gjermanisë të vazhdojë.
Konjufca këto qëndrime i ka dhënë gjatë takimit që ka zhvilluar me Kryetarin e Komisionit për Punë të Jashtme në Bundestag, Michael Roth, i cili shoqërohej nga zv.ambasadori gjerman në Kosovë, z. Mathias Conrad, nga Dr Ursula Bell dhe Sebastian Leuschner.
“Gjermania ka qenë shumë e angazhuar edhe sa i përket dialogut për normalizim mes Republikës së Kosovës dhe Serbisë, të lehtësuar nga Bashkimi Evropian. Duke marrë parasysh rolin e Gjermanisë brenda BE-së, i kërkova z.Roth që angazhimi gjerman të vijojë dhe se ne e konsiderojmë jashtëzakonisht të rëndësishëm, për një proces parimor, efikas dhe të balancuar”, ka shkruar Konjufca në Facebook.
Ai tha se në takim u diskutua edhe për raportet ndërmjet dy vendeve , të cilat kryeparlamnetari i vlerëso si të shkëlqyera.
“Kontributi i shtetit gjerman është i pazëvendësueshëm, si në të shkuarën edhe sot, gjë për të cilën i shpreha mirënjohje z.Roth dhe ne synojmë që raportet e shkëlqyera t’i mirëmbajmë dhe t’i zhvillojmë me bashkëpunimin në të gjitha sferat”, ka shkruar ndër të tera Konjufca.
Kryetarin e Komisionit për Punë të Jashtme në Bundestag, është pritur në takim edhe nga kryeministri i Kosovës, Albin Kurti./teve1.info/
