Në seancën e veçantë të Kuvendit të Kosovës në nderim të akademikut Rexhep Qosja, zëvendëskryeministri Glauk Konjufca ka vlerësuar lart figurën dhe trashëgiminë e tij intelektuale.
Konjufca e cilësoi Qosjen si një nga personalitetet më të rëndësishme të kombit shqiptar, duke theksuar se gjithë veprimtaria e tij ishte e orientuar nga ideali i lirisë kombëtare dhe vetëdijes historike.
Sipas tij, Qosja i kushtoi jetën dhe krijimtarinë e tij përballjes me shtypjen dhe ndërtimit të vetëdijes kombëtare, të cilën e konsideroi bazë të domosdoshme për shtetin dhe identitetin.
Ai shtoi se në këtë kuptim, Qosja shpesh cilësohet si “rilindësi i fundit”, pasi besonte fuqishëm se gjuha dhe unifikimi i saj janë themel i unitetit kombëtar dhe zhvillimit të vetëdijes së përbashkët shqiptare.
“Ai ishte një nga intelektualët, shkrimtarët, veprimtarët më të rëndësishëm të kombit tonë. Çdo krijues përshkohet nga një princip suprem qëllimor i cili është forca e vërtetë shtytëse e veprimtarisë së tij. Por cili ishte principi i Qosjes? Elani i tij ishte liria kombëtare. Prandaj gjithçka që prodhoi e ka formën e luftës kundër shtypjes”, tha ai.
