Ministri në detyrë i Punëve të Jashtme dhe Diasporës, Glauk Konjufca, ka marrë pjesë në takimin e ministrave të punëve të jashtme në formatin “Miqtë e Ballkanit Perëndimor dhe partnerët e BE-së”, i cili u mbajt në Kështjellën e Bratislavës në Sllovaki.
Takimi u organizua nga Ministri i Punëve të Jashtme dhe Çështjeve Evropiane të Sllovakisë, Juraj Blanár, dhe mblodhi delegacione nga 13 vende si dhe Komisioneren Evropiane për Zgjerim, Marta Kos.
Sipas njoftimit të MPJD-së, në seancën hapëse të takimit, Konjufca ka theksuar se Kosova mbetet e përkushtuar dhe e gatshme për marrjen e statusit të vendit kandidat në Bashkimin Evropian dhe për hapjen e negociatave të anëtarësimit.
Në seancën e dytë, e cila u fokusua në sigurinë si dimension i ri i integrimit evropian, ai ka theksuar rëndësinë e integrimit gradual të Ballkanit Perëndimor në arkitekturën e sigurisë së Evropës, duke përfshirë bashkëpunimin në mbrojtje, siguri kibernetike dhe përafrim me standardet e NATO-s.
Konjufca gjithashtu ka vlerësuar se anëtarësimi i vendeve të rajonit që nuk janë ende pjesë e Aleancës është interes strategjik për stabilitetin e Ballkanit Perëndimor dhe të gjithë Evropës.
Kosova, sipas tij, mbetet e përkushtuar për thellimin e bashkëpunimit me partnerët evropianë dhe avancimin e rrugës drejt integrimit në Bashkimin Evropian.
