Në një intervistë të mërkurën, kryeministri Kurti ka thënë se Lajçaku mund ta çojë draftin në Komisionin e Venecias, të cilin e ka konsideruar si “non-paper”.
Konjufca mbështeti idenë e kryeministrit Albin Kurti që emisari i BE-së për dialogun, Miroslav Lajçak ta dërgojë draft-statutin e Asociacionit në Komisionin e Venecias.
Kryeparlamentari u shpreh se Bashkimi Evropian po dëshiron me zor që t’ia marrë kompetencat Kosovës për hartimin e draftit për Asociacionin.
“Është një ide, pra dërgimi i draftit të Lajçakut në Komisionin e Venecias që edhe unë si kryetar e mbështesë. Drafti ka një parregullsi sepse nuk është kompetencë e BE-së. Nëse nuk e modifikon këtë qëndrim, atëherë kjo tregon se BE-ja po do me zor me ja marrë kompetencat Kosovës për hartimin e tij”, tha Konjufca.
Konjufca tha se asnjëherë nuk i është dhënë Kosovës afat për hartimin e draft statutit të Asociacionit.
“Për këtë arsye unë po them që nuk është fer ndaj Kosovës. Kjo është si një lloj grabitje, do ta kisha quajtur, e një kompetence shtetërore të Republikës së Kosovës. Këtë kompetencë me çdo kusht Kosova duhet ta ruajë, Kosova nuk bën të lëshojë pe se ajo duhet ta propozojë draftin”, tha tutje Konjufca.
Por, ndryshe mendon shefi i grupit parlamentar të LDK-së, Arben Gashi. Ai tha se Kosova tashmë ka humbur mundësinë për të hartuar vetë draftin e Asociacionit.
“Sipas deklarimeve të kryeministrit po, ju e keni pa intervistën e kryeministrit ku deklarohet se Kosova më nuk e ka mundësi të shkruaj draftstatutin ndërkohë e ka pas. Kryeministri i Kosovës është parter i pabesueshëm për ndërkombëtarët dhe ky është një dëm ekstra për Kosovën”, tha Gashi.
Konjufca ka folur edhe për raportet me presidenten e vendit, Vjosa Osmani. Ai tha se nuk ka luftë politike midis qeverisë dhe presidentes.
“Ajo çfarë është e rëndësishme që mos të përsëritet ajo çfarë ndodhi para 5-6 viteve, kur kryeministri doli kundër ndryshimit territorial, ishin personalitete tjera që ishin pro ndryshimit territorial, dhe ndërkombëtarët çuditeshin se si institucionet qendrore marrin orientime të ndryshme sa i përket interesave vitale të shtetit tonë. Unë nuk shoh asgjë të ngjashme tash me të kaluarën”, tha ai.
Konjufca ka thënë se Kusari- Lila nuk dyshohet për tradhti kombëtare kur është pyetur për bisedën e saj me ish-nënkryetarin e Listës Serbe, Milan Radoiçiq.
“Nuk kam asnjë dyshim në orientimin dhe qëndrueshmërinë kombëtare të zonjës Kusari- Lila. Pra nuk kam asnjë dyshim për tradhti kombëtare apo çfarë do natyre. Mund ta quani gabim a po pakujdesi e saj, mirëpo sa i përket kësaj se çfarë më tregon mu që është vazhdimësi i tjerrjes së një rasti që është publiku para 7-8 muajve, vetëm tash po publikohen sekuenca që po i konvenon dikujt”, tha kryetari i Kuvendit.
Këto deklarata u bënë pas mbledhjes së Kryesisë së Kuvendit, e cila dështoi të enjten, pasi që nuk pati kuorum për t’u mbajtur mbledhja.