Kjo u bë e ditur sot në seancën e Kuvendit Komunal të Prishtinës ku pika e 4 e rendit të ditës ishte ky propozim – vendim për subvencionimin e nënave lehona, përfituese të skemës sociale për të porsalindurit tyre, transmeton teve1.info.
Premtim Fazliu nga Drejtoria për Mirëqenie Sociale në Komunën e Prishtinës, ka thënë se nga janari deri në prill të këtij viti janë realizuar 17 lindje të tilla duke theksuar se kjo ndihmë është paraparë të filloj nga data 1 janar i këtij viti dhe sipas tij, ka mundësi që të vazhdohet edhe në vitet e tjera duke mos specifikuar afat të skadencës.
“Drejtoria për Mirëqenie Sociale në bazë të zhvillimit të takimeve të drejtpërdrejta që ka realizuar me nënat vetushqyese edhe familje me skemë sociale në Komunë të Prishtinës, por gjithashtu edhe bazuar në hulumtimin e vlerësimit të nevojave të skemës sociale të realizuar gjatë viti që lamë pas si dhe në kuadër të fuqizimit të familjeve me skemë sociale, sjellë në këtë kuvend propozim vendimin për subvencionimin e nënave lehona pjesë të skemës sociale për subvencionimin e tyre me shumë prej 500 euro”, ka thënë Fazliu.
Sipas Fazliut kjo shumë do të kontribuoj si ndihmë financiare që të iu mbuloj së paku shpenzimet pas procesit të tyre të lindjeve .
“Janë marrë për bazë regjistrat e 5 viteve të fundit, domethënë për lindjet nga nënat të cilat janë pjesë e skemës sociale ku dhe sipas këtij kalkulimi kanë dalë 70 familje për vit që nëse konvertohet në mjete monetare i bie 35 mijë euro në vit”, ka thënë Fazliu./Teve1.info
