Komuna ka shkruar se sa i përket stadiumit të Magures, të gjitha kontratat janë publike qëkur ato janë nënshkruar.
Sipas versionit të komunës së Lipjanit, reshjet e shiut në janar të 2021 kishin shembur dheun e stadiumit i cili kishte dëmtuar rrethojat e Qendrës së Azilit në Magure. Megjithatë, komuna ka bërë të ditur se operatorët të cilët ishin kontraktuar për t’i riparuar ato shembje, nuk e kishin kryer punën e tyre.
“Pas kësaj shembje, komuna dy herë ka publikuar procedura për të riparuar atë shëmbje dheu nga reshjet dhe në të dy rastet të dy operatoret e kontraktuar (njoftimet janë publike në ëebsajt) nuk kanë kryer punimet dhe nuk janë paguar për punët e pakryera”, thuhet në njoftim.
Deklarimet e prokurorisë komuna i ka quajtur paushalle dhe të paverifikuara.
“Ne, kuptojmë dhe inkurajojmë punën e organeve të drejtësisë që të jetë e pavarur dhe korrekte, por asesi deklarimet paushalle e të paverifikuara. Duhet të vlejë prezumimi i pafajësisë deri në vërtetimin e fajësisë e jo me komente me erë terësisht politike pa asnjë lloj verifikimi të së vërtetës”, thuhet në reagim.
Komuna është zotuar se punimet për ndërtimin e stadiumit do të përfundojnë brenda vitit.
“Ne po angazhohemi që shumë shpejt të përfundojnë investime për të finalizuar punimet në stadium dhe ju sigurojmë se punimet do të përfundojnë gjatë këtij viti”, thuhet në reagim.
Sipas komunikatës së lëshuar nga Prokuroria Speciale e Kosovës, personat e arrestuar në cilësinë e personave zyrtar, si anëtarë të Komisionit teknik kanë bërë pranimin e punimeve të stadiumit futbollistik në fshatin Magure Komuna e Lipjanit, kinse janë kryer punimet sipas kontratës së fituar nga një kompani.
