Nënkryetari i Komunës së Graçanicës, Lutrim Ajeti ka njoftuar se sot (e premte), Kuvendi Komunal ka miratuar vendimin për faljen e 100 eurove të tatimit në pronë për të gjithë qytetarët e kësaj Komune.
Sipas tij, për vitin 2023, secilit qytetar të Komunës së Graçanicës do t’iu falen 100 euro të tatimit në pronë.
“Kuvendi Komunal sot me shumice votash ka miratuar vendimin per faljen e tatimit ne prone ne perputhje me Ligjin nr.08/L-224 per ndryshim dhe plotesim te Ligjit nr. 06/L-005 per tatimin ne pronen e paluajtshme. Pra per vitin 2023, secilit qytetar te Komunes se Gracanices do t’iu falen 100 euro te tatimit ne prone!”, ka shkruar Ajeti në Facebook.
Ndryshe, Asociacioni i Komunave të Kosovës (AKK), e ka dërguar në Gjykatën Kushtetuese Ligjin për Tatimin në Pronë.
Dorëzimi i kërkesës për vlerësimin e ligjshmërisë së këtij ligji e bë nga drejtori i AKK-së, Sazan Ibrahimi dhe kryetari i Prizrenit, Shaqir Totaj.
Teksa Ministri i Financave, Hekuran Murati këtë veprim të AKK-së e ka cilësuar si “të kotë”.
Më 27 korrik, Kuvendi ka miratuar ndryshimin e Ligjit të ri për tatimin në pronën e paluajtshme, i cili parasheh mundësinë për të përfituar nga zbritja e faturave të vitit 2023 deri në 100 euro, lirime tatimore për banimin primar dhe tokën bujqësore, kufizim të përllogaritjes së interesit që të mos tejkalojë vlerën e detyrimit tatimor, zbritje të shkallës së poshtme tatimore për vitin 2024 dhe fillimin e aplikimit të tatimit progresiv nga viti 2025.
Mbi 27 milionë euro llogaritet të jetë dëmi që u shkaktohet 29 komunave nga zbatimi i vendimit për faljen e 100 eurove nga tatimi në pronë brenda këtij viti kalendarik./teve1.info./
