Mëngjesin e së enjtes linjat Prishtinë-Podujevë nuk qarkulluan si zakonisht.
Kjo meqë kompanitë e udhëtimit në këtë magjistrale pezulluan përkohësisht operacionet e tyre.
Ata u mblodhën në fshatin Lupç, në shenjë proteste ndaj komunës së Prishtinës.
Pasi kjo e fundit, lëshoi për qarkullim linjën 22 të trafikut urban, në rrugën magjistrale Podujevë-Prishtinë, Prishtinë-Vranidoll dhe Prishtinë-Lluzhan-Sharban.
E për të ruajtur rendin, aty u panë edhe pjesëtarë të Policisë së Kosovës.
“Për Sharban na ka hy edhe në komunë të Podujevës. Na ju kemi shkru qe tri javë ditë të gjitha institucioneve, s’na është përgjigj askush, e ne jemi detyru me dalë padashje në protestë. Sot kem n’komunë pak ma herët po s’arritëm marrëveshje kurgjë”, tha Beqir Mustafa, kryetar i shoqatës së transportit “Prishtinë – Podujevë”.
Ndryshe nga kompanitë private të transportit që operojnë në këtë rrugë, pagesa me autobusët e komunës së Prishtinës është 0.80 cent për 12 orë.
“Deri në këtë pikë e kemi pasë 80 cent, një euro deri në Podujevë. Sa i përket me kilometrazh kemi qenë më të lirët në Kosovë, për shkak veç të udhëtarëve. E tash prej që i ka lëshu komuna këta autobusa, ata janë nën atë çmim. Në këtë mënyrë duhet me ndërpre punën krejt. Nuk mundemi me ekzistu, as s’mundemi me mbajt familjen, as s’mundemi me i pagu punëtorët, as shërbimet e shtetit as kurgjë hiç”, ka thënë Afrim Leci, pronar i një komapine të autobusëve.
Se i rrezikohet puna thotë edhe pronari i një tjetër kompanie, Mentor Mustafa.
“Neve na ka dëmtu shumë, sa po vjen puna deri në falimentim të kompanive qe 30 vjet që operojnë në trasën Podujevë-Prishtinë. Na ka qitë në konflikt me kolegët tjerë. Ne nuk jemi për me bo probleme, ne po i kërkojmë të drejtat ton”, thotë Mustafa.
Sipas Shoqatës së Transportit Prishtinë-Podujevë, në këtë magjistrale operojnë 30 kompani udhëtimi.
Ndërsa qarkullim të autobusëve ka çdo dhjetë minuta në këtë relacion, e ndërmjet tyre operojnë edhe autobusë të tjerë.
