Komandanti i KFOR-it, Ozkan Ulutas, ka dhënë detaje nga qëndrimi i tij në Bruksel, ku ka informuar ambasadorët e vendeve anëtare të NATO-s për misionin.
Në një mesazh të publikuar në Facebook, Ulutas ka thënë se KFOR-i mbetet shtylla kyçe e stabilitetit në Kosovë dhe në rajon.
“KFOR-i ka qenë dhe mbetet një shtyllë kyçe e stabilitetit në Kosovë dhe në të gjithë Ballkanin Perëndimor. Kjo është e vërtetë edhe sot. KFOR-i është një dëshmi konkrete e këtij angazhimi të qëndrueshëm”.
Ai ka shprehur mirënjohje për vendet anëtare të NATO-s dhe partnerët për mbështetjen e vazhdueshme ndaj misionit.
“Jam mirënjohës ndaj të gjitha vendeve anëtare të NATO-s dhe partnerëve për përpjekjet e tyre për të siguruar që KFOR-i të jetë i pajisur dhe i pozicionuar mirë për të vazhduar zbatimin e plotë dhe të paanshëm të mandatit të tij nga OKB-ja”.
Ulutas ka theksuar gjithashtu bashkëpunimin e ngushtë me palët e ndryshme në terren.
“Si komandant i misionit, vazhdoj të mbaj lidhje të ngushta me të gjithë bashkëbiseduesit kryesorë, përfshirë përfaqësues të komunitetit ndërkombëtar, të organizatave të sigurisë në Kosovë dhe të Forcave të Armatosura të Serbisë”.
Ai ka nënvizuar se ekziston nevoja urgjente për një zgjidhje politike të qëndrueshme.
“Përmes pranisë dhe aktiviteteve tona, ne vazhdojmë të krijojmë hapësirë që dialogu politik të ecë përpara. Kjo është arsyeja pse – siç e kam dëgjuar sërish sot, qartë dhe fort – NATO vazhdon të mbështesë plotësisht dhe fuqishëm dialogun e lehtësuar nga BE-ja për normalizimin e marrëdhënieve ndërmjet Beogradit dhe Prishtinës”.
Në fund, Ulutas ka theksuar se stabiliteti varet nga zgjedhja e dialogut në vend të dhunës.
“Në fund, stabiliteti varet nga zgjedhja e të gjitha palëve për diplomaci në vend të dhunës. Rruga drejt paqes afatgjatë është politike. Nuk është ushtarake”. “KFOR-i do të vazhdojë të bëjë pjesën e vet në mbështetje të këtij procesi”, ka thënë Ulutas.
