Komandanti i misionit të NATO-s në Kosovë (KFOR), gjeneralmajori Ozkan Ulutaş, ka zhvilluar një takim në selinë e KFOR-it në Kampin Film City në Prishtinë me ambasadorë, shefa misionesh dhe përfaqësues të lartë nga 31 shtetet kontribuuese me trupa në këtë mision.
Sipas njoftimit të KFOR-it, gjatë takimit Ulutaş prezantoi situatën aktuale të sigurisë në Kosovë, aktivitetet e vazhdueshme të misionit dhe prioritetet kryesore për periudhën në vijim.
Ai rikonfirmoi përkushtimin e KFOR-it për të garantuar një mjedis të sigurt dhe të qetë për të gjithë qytetarët e Kosovës, duke theksuar rëndësinë e koordinimit dhe bashkëpunimit të vazhdueshëm me partnerët ndërkombëtarë.
Gjeneralmajori Ulutaş shprehu gjithashtu mirënjohjen ndaj shteteve kontribuuese për mbështetjen e tyre të vazhdueshme në realizimin e mandatit të misionit.
“KFOR-i vazhdon ta zbatojë mandatin e tij – të bazuar në Rezolutën 1244 të Këshillit të Sigurimit të Kombeve të Bashkuara të vitit 1999 – për të kontribuar në krijimin e një mjedisi të sigurt dhe të qetë, si dhe në garantimin e lirisë së lëvizjes për të gjithë njerëzit që jetojnë në Kosovë, në çdo kohë dhe në mënyrë të paanshme. KFOR-i bashkëpunon ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), në përputhje me rolet e tyre përkatëse si reagues të sigurisë”, theksohet në njoftim./teve1.info/
