Personat të cilët kanë kërkuar azil në Britani por janë refuzuar, mund të përfundojnë në Kosovë.
Kjo pasi kryeministri në detyrë, Albin Kurti ka shprehur gatishmërinë që të njëjtit të vijnë këtu.
E si këmbim, Kurti ka kërkuar që Kosova të marrë mbështetje në fushën e sigurisë.
Një gjë të tillë po e shohin vështirë të realizueshme nga Këshilli për Mbrojtjen e të Drejtave dhe Lirive të njeriut.
Behxhet Shala nga KMDLNJ thotë se vendi nuk ka kapacitete për pranimin e azilkërkuesve të refuzuar nga Anglia.
“Kosova nuk ka kapacitet as me menaxhu e as me mbikëqyr. Nëse i merr Kosova, atëherë ata nuk mund të tatohen sikurse në burg pasi i kanë disa të drejta dhe ato të drejta nuk mund të plotësohen dhe automatikisht bëhet shkelja e të drejtave të njeriut. Këtë Kurti më shumë e ka bërë për të dalë nga një izolim”, ka vlerësuar ai.
Se cilat janë anët negative nga pranimi i këtyre migrantëve, i tregon edhe njohësi i çështjeve të Migracionit, Refki Morina.
“Nëse nuk bëhet një kalkulim i mirë i shpenzimeve, mund të na kushtojë, pra nëse Anglia nuk i merr disa shpenzime, mund t’ia lë Kosovës që t’i kryej. Poashtu edhe integrimi i azilkërkuesve kërkon një punë sistematike, një përkushtim të vazhdueshëm, kuadra profesional, që i edukon i bën harmonin”, thotë Morina.
Derisa sipas tij, kjo mundësi ka edhe anët e saj pozitive.
“Është pozitive se anglezët, grupet punuese që punojnë parashohin edhe shpenzimet e anglezëve në infrastrukturë, do të thotë në ndërtimin e qendrës së azilantëve, është e mirë se qytetarët kosovarë punësohen, gjithash një e mirë tjetër që e shoh unë është në aspektin diplomatik, Kosova me aq sa mundet i ndihmon Anglisë, në mënyrë që të ia kthejë atë që ata kanë bërë për neve”, shprehet Morina.
Muaj më parë, Qeveria në detyrë e Kosovës ishte shprehur e hapur për të biseduar me Britaninë për ndërtimin e qendrave për strehimin e azilkërkuesve të refuzuar nga ky vend.
Poashtu, Kosova u pajtua t’i strehojë 50 migrantë nga shtete të treta që qëndronin në SHBA.
