Në komunikatën e KMDLNJ-së, thuhet se të gjitha partitë politike, duhet të kërkojnë që zgjedhjet të mbahen në një kohë kur të plotësohen kushtet për mbajtjen e tyre.
Sipas KMDLNJ-së, që nga dita e shpalljes së zgjedhjeve u vunë në veprim strukturat paralele për të penguar këto zgjedhje përmes frikësimit të votuesve të mundshëm si dhe kandidatëve, përfaqësues të subjekteve politike apo kandidatë të pavarur të cilët u tërhoqën nga gara.
“Sidomos kohëve të fundit janë aktivizuar forcat që zbatojnë dhunë psikike dhe fizike ndaj atyre që kundërshtojnë Partinë Paramilitare Politike, Listën Serbe, e cila, në emër të ‘mbrojtjes’ së interesave të serbëve angazhohen të zbatojnë politikat destabilizuese të Serbisë në Kosovë. Është shpeshtuar hedhja e mjeteve plasëse që rrezikojnë, jetën, sigurinë dhe pronën e qytetarëve të atyre komunave me qëllim të krijimit të kushteve penguese për mbajtje të zgjedhjeve. Nëse të gjitha këto merren parasysh sikur që pjesa dërrmuese e votuesve të nacionalitetit serbë po i bojkotojnë këto zgjedhje KMDLNj–ë e vlerëson se nuk ka kushte elementare të mbahen zgjedhjet e shpallura nga Presidentja e Kosovës”, thuhet në komunikatë.
Teksa theksohet se në zgjedhje votohet për përfaqësim politik, pa u kërcënuar liria e votës dhe pa u dhunuar vullneti i votuesit.
Ndryshe ministri i Punëve të Brendshme, Xhelal Sveçla ka thënë se kanë kapacitet që të ofrojnë siguri dhe mbajtje të zgjedhjeve në katër komunat veriore.