Ministria e Punëve të Jashtme dhe Diasporës ka njoftuar se është duke ndjekur nga afër arrestimin e Arbnor Fatmir Spahiut, ish-pjesëtar i Njësisë Speciale të Policisë së Kosovës, i ndaluar më 7 qershor në pikën kufitare Serbi-Hungari, teksa po udhëtonte me familjen nga Austria.
Sipas MPJD-së, ai ndodhet në paraburgim 30-ditor në Suboticë, i akuzuar për rastin e Banjskës – akuza që familja dhe mbrojtja i quajnë të pabazuara.
Spahiu jeton në Gjermani që nga viti 2022.
Ambasadori Jetish Jashari dhe avokati Arianit Koci do të vizitojnë Suboticën më 11 qershor.
Është dorëzuar kërkesë për vizitë në qendrën e paraburgimit. Rasti është bërë i ditur edhe misioneve të Quint-it dhe trupit diplomatik në Kosovë.
MPJD thotë se do të përdorë të gjitha mjetet diplomatike për lirimin e tij të menjëhershëm.
“Republika e Kosovës do të vazhdojë të shfrytëzojë të gjitha kanalet diplomatike në dispozicion për të siguruar që kjo padrejtësi e radhës ndaj një shtetasi të Republikës së Kosovës të marrë fund, dhe që z. Spahiu të lirohet sa më parë”, thuhet në njoftim./teve1.info/
