Kampioni i Kosovës në hendboll, Istogu, i luan në fundjavë dy ndeshje të raundit të dytë të Kupës Evropiane (EHF European Cup) për hendbolliste.
Në palestrën “Dresha” në Banjë, Istogu takohet me skuadrën greke, AEP Panorama.
Ndeshja e parë është të shtunën nga ora 19:00. Ndërkohë ndeshja e dytë zhvillohet të dielën po nga ora 19:00. Skuadrat janë pajtuar që dy ndeshjet të luhen në shtëpinë e Istogut.
Kampioni kosovar kërkon suksesin e radhës në Kupën Evropiane.
Istogaset që nga viti 2017 paraqiten rregullisht në gara kontinentale. Në katër raste kanë kaluar nga një kundërshtar evropian, ndërsa të paktën këtë sukses e synojnë edhe këtë edicion.
AEP Panorama tri herë ka garuar në Evropë. Vetëm në një rast e ka kaluar një kundërshtar.
