KFOR-i ka njoftuar se, Policia Ushtarake e Karabinierëve, pjesë e Njësisë së Specializuar Shumëkombëshe (MSU), ka kryer patrullime të rregullta në Mitrovicën e Veriut.
Sipas njoftimit zyrtar, këto patrullime zhvillohen në mënyrë të vazhdueshme me qëllim sigurimin e një mjedisi të qetë dhe të sigurt për të gjithë qytetarët.
KFOR-i ka theksuar se këto aktivitete ndihmojnë në ruajtjen e vetëdijes për situatën në terren dhe reflektojnë angazhimin e misionit për të garantuar siguri dhe lirinë e lëvizjes në Kosovë, në mënyrë transparente dhe të paanshme.
“KFOR-i vazhdon të zbatojë mandatin e tij – bazuar në Rezolutën 1244 të Këshillit të Sigurimit të OKB-së të vitit 1999 – për të kontribuar në një mjedis të sigurt për të gjithë njerëzit që jetojnë në Kosovë dhe lirinë e lëvizjes, në çdo kohë dhe në mënyrë të paanshme. KFOR-i punon në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), në rolet e tyre përkatëse si reagues të sigurisë”, theksohet në njoftim./teve1.info/
