Futbollistet e Mitrovicës janë ndalur në ndeshjen e parë të mini-turneut kualifikues të Ligës së Kampionëve.
Kampionia e Kosovës, është ndalur nga Cliftonville i Irlandës së Veriut në gjysmëfinale të mini-turneut të organizuar në Kosovë.
Të mërkurën, në stadiumin “Zahir Pajaziti” në Podujevë, Mitrovica ka pësuar me rezultatin 3:1 pas dy vazhdimeve nga 15-të minuta.
Koha e rregullt e takimit përfundoi me shifrat 1:1, përpara se futbollistet e ekipit nga Irlanda e Veriut të realizojnë dy gola në vazhdime dhe të konfirmojnë kualifikimin në finale të mini-turneut.
Mitrovica kaloi në epërsi me anë të Edona Maliqit në pjesën e parë dhe pati raste të mira për të dyfishuar epërsinë, por nuk ia doli mbanë.
Kështu që, KFF Mitrovica i jep fund aventurës evropiane për sezonin 2025/26 në ndeshjen e saj të parë.
