Qeveria e Republikës së Kosovës ka mbajtur mbledhjen e rregullt, në të cilën ka miratuar një sërë projektligjesh dhe vendimesh me rëndësi për funksionimin institucional të vendit.
Ndër vendimet kryesore, ekzekutivi miratoi Projektligjin për Masat e Përkohshme të Produkteve Themelore në raste të destabilizimit të tregut, i cili parasheh krijimin e një Bordi të Pavarur për rregullimin e çmimeve në situata të jashtëzakonshme.
Po ashtu, u miratua Projektligji për Sigurimin e Detyrueshëm të Kujdesit Shëndetësor, që rregullon sistemin e sigurimeve shëndetësore dhe themelon Fondin e Sigurimit Shëndetësor, duke përcaktuar përfitimet, kontributet dhe organizimin e këtij sistemi.
Kabineti qeveritar miratoi edhe Projektligjin për Shtetësinë e Kosovës, i cili përcakton mënyrat e fitimit, humbjes dhe regjistrimit të shtetësisë, si dhe Projektligjin për Lëndët Plasëse, që rregullon prodhimin, përdorimin dhe tregtimin e tyre në funksion të sigurisë publike.
Në fushën e arsimit, u miratua Projektligji për Provimin e Maturës Shtetërore, ndërsa në aspektin financiar u aprovuan ndryshimet në Ligjin për Kontabilitet, Raportim Financiar dhe Auditim, si dhe Projektligji për Shërbimet e Pagesave, me synim rritjen e sigurisë dhe integrimit të tregut të pagesave.
Gjithashtu, Qeveria miratoi Projektligjin për organizimin e Lojërave Mesdhetare “Prishtina 2030”, duke përcaktuar përgjegjësitë institucionale për këtë ngjarje ndërkombëtare.
Në kuadër të vendimeve të tjera, u emërua Bordi i Drejtorëve i Kompanisë Rajonale të Ujësjellësit “Hidrodrini” në Pejë, u aprovua ndarja e mjeteve financiare për Luginën e Preshevës dhe u miratua kërkesa e Komisionit Qendror të Zgjedhjeve për mbi 2.2 milionë euro për mbulimin e shpenzimeve nga zgjedhjet e parakohshme të dhjetorit 2025.
Po ashtu, u miratua edhe Plani i Veprimit për Qeverisje të Hapur 2026–2028, i cili synon rritjen e transparencës, llogaridhënies dhe pjesëmarrjes qytetare./teve1.info/
