Është xhamia e vjetër e fshatit Burojë të Skenderajt.
Por, në vitet e ’90-ta, roli i saj nuk ishte vetëm si faltore e myslimanëve.
Për plot 5 vjet, në të u strehua një sasi e madhe e armatimit të Ushtrisë Çlirimtare të Kosovës.
E këtë sekret, e dinin vetëm pak persona, përfshirë imamin e kësaj xhamie, Avdyl Krasniqi dhe Hashim Thaçi.
Këtë ky i fundit, e konfirmoi së fundmi në një intervistë televizive.
Madje nga Haga, ish-drejtori politik i UCK-së, tha se vet imami i ndjerë, Avdyl Krasniqi, i bëri thirrje xhematit t’i bashkoheshin luftës për liri.
E këtë moment thotë se e mban mend mirë, myezini i xhamisë, Sokol Krasniqi.
Por, porosia e Avdyl Krasniqit, nuk mbeti vetëm fjalë brenda xhamisë.
Imami i ndjerë, e veshi uniformën e UCK-së, duke i prirë xhematit në luftën për çlirimin e vendit.
Ish-komandant “Pllumi” thotë se imami shërbeu si motiv për ushtarët e tjerë.
Kurse imami aktual, tha se kjo xhami shërbeu edhe si vendstrehim për të plagosurit.
Ndryshe, Xhamia e ndërtuar në vitin 1722, aktualisht po i nënshtrohet një restaurimi dhe do të shërbejë si muze.
Ndërsa për shumë vjet kishte shërbyer edhe si vend ku u mësua shkrim – leximi i gjuhës shqipe.
