Analisti serb, Branisllav Kërstiq, thotë se në amplitudën e tradhtisë të interesave të serbëve në Kosovë, presidenti serb, Aleksandar Vuçiq, së bashku me Listën Serbe janë duke shkuar deri në fund.
Sipas tij, serbët e veriut do ta bojkotojnë votimin për largimin e kryetarëve shqiptarë të katër komunave veriore që pritet të mbahet të dielën, pasi kryetari i Serbisë insiston për bojkot të këtij procesi.
Në lidhje me arrestimet e qytetarëve kosovarë nga ana e Serbisë, djegies së veturave në veri, refuzimin që institucionet arsimore të shërbejnë si qendra të votimit të dielën, Kërstiq tha se e tëra është lojë e Vuçiqit dhe shfaqje e Beogradit zyrtar, që shërben vetëm për konsum të brendshëm.
Ndërkaq, sa i përket mundësisë së tensionimit të situatës dhe provokimeve apo krijimit të incidenteve nga grupe të caktuara të dielën në veri, ai theksoi se nuk do të ketë asnjë incident, sepse popullata lokale thjesht do ta injorojë këtë proces.
“Kemi tensione, është e kuptueshme dhe shumica e këtyre tensioneve janë të dirigjuara nga Beogradi zyrtar. Mirëpo, kohët e fundit, flas për gjashtë muajt e fundit, pas tragjedisë në Bajnskë, ne kemi edhe grupe me interesa politike të ndryshme të cilat bëjnë pjesë në djegien e veturave edhe të pjesëtarëve të Listës serbe, mbase ekziston opsioni që Lista Serbe vetë është duke i djegur veturat e tyre, sepse për ta dy-tre mijë euro nuk janë asgjë, për ta tensionuar veriun e vendit… Nuk do të kemi asnjë incident (të dielën)… Votimi për shkarkimin e kryetarëve do të jetë i injoruar nga popullata lokale dhe do ta kemi një atmosferë pothuajse të njëjtë sikurse kur kryeministri Kurti ka vizituar veriun e vendit’, ka thënë për KP Kërstiq.
