Prokuroria Themelore në Mitrovicë ka kërkuar nga Gjykata Themelore caktimin e masës së paraburgimit ndaj tre të dyshuarve, me inicialet H.K., A.G. dhe E.G., nën dyshimin për kryerjen e veprës penale “Pranimi i ryshfetit në sektorin privat”.
Sipas Prokurorisë, ekziston dyshimi i bazuar se më 6 shkurt 2026, në objektin e Stacionit të Autobusëve në Mitrovicë, H.K., në cilësinë e instruktorit të një auto-shkolle, dhe A.G., ish-instruktor i kësaj auto-shkolle, kanë pranuar para në shuma të panjohura me qëllim që t’ua mundësonin kandidatëve kalimin e testit teorik për patentë-shofer.
Sipas kërkesës për paraburgim, të dyshuarit dyshohet se një kandidateje, me inicialet K.K., i kanë vendosur në rroba një pajisje-kamerë dhe i kanë dhënë një kufje në vesh, përmes të cilave i kanë treguar përgjigjet e sakta gjatë testit. E njëjta mënyrë, sipas Prokurorisë, dyshohet se është përdorur edhe me kandidaten A.D.
Ndërkohë, më 31 gusht 2026, H.K. dhe E.G., dyshohet se në bashkëpunim me njëri-tjetrin kanë pranuar para në shuma të panjohura, me qëllim që t’ua mundësonin kandidatëve A.R. dhe F.Z. kalimin e testit teorik për patentë-shofer.
Prokuroria pretendon se kandidates A.R. i është dhënë një këmishë e zezë me pajisje elektronike të montuar dhe një kufje, ndërsa kandidatit F.Z. një jelek i zi me pajisje elektronike dhe kufje. Ata dyshohet se janë udhëzuar që përmes këtyre pajisjeve të merrnin përgjigjet e sakta gjatë testimit.
Prokuroria ka kërkuar caktimin e paraburgimit për tre të dyshuarit, ndërsa seanca për shqyrtimin e masës së paraburgimit do të mbahet në Gjykatën Themelore në Mitrovicë.
Të dyshuarit konsiderohen të pafajshëm sipas ligjit deri në një vendim përfundimtar të gjykatës.
