Prokuroria Themelore në Mitrovicë ka kërkuar nga Gjykata Themelore në Mitrovicë caktimin e paraburgimit ndaj policit të Njësisë Speciale Operative në Mitrovicë M.L., për shkak të dyshimit se ka kryer veprat penale keqpërdorimi i pozitës apo autoritetit zyrtar, zbulimi i fshehtësisë zyrtare, mbajtja në pronësi, kontroll ose posedim të paautorizuar të armëve.
I pandehuri më 2 shtator 2025 në Ropicë të Vushtrrisë, duke e shfrytëzuar detyrën dhe autoritetin zyrtar si zyrtar policor, me qëllim të përfitimit të dobisë pasurore për vete dhe personin tjetër, shkon te shtëpia e të pandehurit K.M., dhe e merr dhe e largon nga shtëpia duke shkuar në drejtim të Prishtinës.
Më 18 qershor 2025 i pandehuri M.L., kontaktohet përmes telefonit nga i pandehuri K.M., i cili e vëren një dron mbi shtëpinë e tij dhe e pyet të pandehurin M.L., se a është duke u hetuar nga policia, i dyshuari – zyrtar policor e informon se në rast kur ai është duke u hetuar ose të ketë veprime tjera do ta njoftojë.
Po ashtu, M.L., në shtëpinë e tij në Vushtrri ka mbajtur një sasi të fishekëve, si dhe në një lokal nate i njëjti përdor armën e tij duke shtënë brenda lokalit shtatë-tetë here, si dhe një ditë tjetër shihet duke shtënë tri herë, pamje këto të publikuara në rrjete sociale, të gjitha këto veprime në kundërshtim me Ligjin mbi armët.
Të pandehurit, gjatë bastisjes së mbrëmshme në shtëpinë dhe veturën e tij, i janë sekuestruar dy telefona dhe fishekë.
