Prokuroria në Ferizaj ka kërkuar caktimin e masës së paraburgimit prej 30 ditësh për katër të dyshuarit për veprën penale “Fajdeja”, për qka një ditë më parë Policia e Kosovës e zhvilloi një aksion në këtë qytet, raporton teve1.info
Sipas komunikatës së Prokurorisë, masa e paraburgimit është kërkuar për të pandehurit: B.M., A.H., B.K. dhe A.M.
Të dyshuarit aktualisht ndodhen në masën e ndalimit 48-orshe.
“Ferizaj, 18 Maj 2023 – Prokuroria Themelore në Ferizaj, Departamenti i Krimeve të Rënda, njofton opinionin publik se ka kërkuar nga Gjykata Themelore në Ferizaj, caktimin e masës së paraburgimit në afat prej 30 ditësh ndaj katër (4) të pandehurve me inicialet B.M., A.H., B.K dhe A.M., për shkak të dyshimit të bazuar të veprave penale “Fajdeja” nga neni 331 paragrafi 3 lidhur me nenin 31 të Kodit Penal të Republikës së Kosovës, “Detyrimi” nga neni 328 par.2 lidhur me nenin 31 të KPRK-ës dhe “Organizimi i skemave piramidale dhe bixhozit të paligjshëm” nga neni 294 par.3 lidhur me par.2, të KPRK-ës”, thuhet në komunikatë.
Lidhur me dyshimin pë kryerjen e veprës penale “Fajdeja”, të mërkurën është zhvilluar një aksion policor në Ferizaj dhe disa lokacione tjera.
