Sekretari amerikan i Shtetit, Antony Blinken, ka kërkuar që Kosova të jetë konstruktive dhe kreative në procesin e dialogut me Serbinë.
Kështu ka bërë të ditur kryeministri i vendit, Albin Kurti, në një intervistë dhënë Zërit të Amerikës, me ç’rast ka theksuar se sekretarit Blinken, i ka premtuar që Kosova do t’i përfill këto kërkesa.
Në anën tjetër, pala serbe vazhdon me avazin e vjetër të bllokimit të bisedimeve. Madje, presidenti i atjeshëm Aleksandër Vuçiq, ka thënë se nuk ka pse të shkoi në dialog, përderisa Kurti është kryeministër.
Për rikthimin dhe përfundimin e këtij procesi, analistja Magbule Shkodra thotë se duhet angazhimi i Shteteve të Bashkuara të Amerikës.
“Unë besoj që Shtetet e Bashkuara të Amerikës veç janë më shumë aktive së që kanë qenë në të kaluarën dhe unë besoj fuqishëm që vetëm Shtetet e Bashkuara të Amerikës nëse janë faktor i fuqishëm në këtë dialog, siç janë tani, do të mund ta zgjidhin këtë proces, përndryshe kam shumë dyshime dhe jam shumë skeptike se Bashkimi Evropian ka fuqi për të bërë diçka më tutje”, tha Shkodra.
E njohësi i çështjeve politike, Melazim Koci, thotë se pa SHBA-të, BE nuk mund të arrijë njohjen e ndërsjellë mes Kosovës dhe Serbisë.
“Është evidente që pas 10 vitesh, Bashkimi Evropian nuk është i aftë, nuk ka kredibilitet për të zgjidhur çështjet politike siç është njohja e ndërsjellët Kosovë Serbi. Mund të zgjidhin çështje teknike, por aspektin politik është evidente që pa pranin direket të Shteteve të Bashkuara nuk mund ta zgjidhim”, tha Koci.
Brukseli kishte paraparë që më 19 korrik të mbahej një takim mes Kurtit e Vuçiqit, por që ky i fundit kishte refuzuar pjesëmarrjen, çka edhe bëri që takimi të anulohet.
Raporti i gazetarit Valmir Gallopeni.
