Përfaqësuesit e Republikës së Kosovës dhe ata të Serbisë e kanë pranuar propozimin e Bashkimit Evropian për normalizimin e raporteve. Kështu të paktën ka deklaruar përfaqësuesi i Lartë i Bashkimit Evropian për Politikë të Jashtme dhe Siguri, Josep Borrell, pas takimit të 27 shkurtit.
Por, pak ditë pas takimit, Serbia ka dhënë shenjat e para të moszbatimit të këtij plani. Profesori universitar, Seb Bytyçi thotë se ka rrezik që arritja e një marrëveshje eventuale të mos zbatohet më pas nga Serbia.
“Pikësëpari ka rrezik që gjatë diskutimit për aneksin e implementimit Serbia ta sabotoi gjithë marrëveshjen duke mos bërë kompromis te aneksi. Dhe pastaj edhe nëse nënshkruhet marrëveshja, në bazë të përvojës e dimë që ka shumë gjasa që Serbia të mos e implementoi marrëveshjen. Fatmirësisht pjesë e marrëveshjes është edhe një komision mbikëqyrës, ku Kosova duhet ta shfrytëzoj atë komision, pra që të insistoi që të implementohet marrëveshja”,tha Bytyçi.
Ndërsa, profesori Abit Hoxha thotë se Kosova duhet të insistoi në transparencën e komisionit mbikëqyrës të zbatimit të marrëveshjes.
“Po gjasat janë të mëdha. Vet fakti që palët janë dakorduar për një marrëveshje, por nuk ka pas “nevojë” me nënshkru, tregon që palët janë pajtuar por nuk janë pajuar … Mendoj që Kosova duhet të investojë në mekanizma implementues të kësaj marrëveshje, nëse nënshkruhet dhe bëhet marrëveshje edhe të jetë sa më transparente ky komisioni vlerësues, sepse transparenca është mjeti i presionit kryesor që e detyron Serbinë me qenë më afër marrëveshjes, përndryshe nuk ka mjete penalizuese për mendimin tim”, tha Hoxha.
Serbia zakonisht nuk e ka respektuar zbatimin e marrëveshjeve të arritura në Bruksel, e për këtë gjë në Kosovë e kanë fajësuar qasjen e butë të Bashkimit Evropian ndaj institucioneve serbe.
Kronika e gazetarit Valmir Gallopeni.
