Brenda tri vitesh, vetëm një personi i është shqiptuar dënim me burgim për armëmbajtje pa leje.
Të tjerët, këtë e kalojnë vetëm me gjobë.
Ani pse, sipas legjislacionit të Kosovës, parashihet dënim me burgim deri në pesë vjet.
Kështu ka dalë me një raport, Instituti i Kosovës për Drejtësi.
Ndërsa Policia e Kosovës, për tëvë1 tregoi se vetëm gjatë vitit 2024 janë konfiskuar 814 armë, 578 më pak se sa vitin 2023.
“Gjatë periudhës janar- korrik 2024, janë konfiskuar 814 armë të ndryshme, gjatë vitit 2023, janë konfiskuar 1392 armë të ndryshme dhe gjatë vitit 2022, janë konfiskuar 1473 armë të ndryshme”, thuhet nga Policia e Kosovës.
E gjithë këtë situatë, eksperti i sigurisë, Fadil Kajtazi po e sheh si dështim të shtetit.
“Shteti ka dështuar që ta minimizojë prirjen për përdorimin e armëve, prirjen për bartjen e armëve pa leje. Politika ndëshkimore është njëri nga faktorët që ndikon që përdorimi i armëve pa leje të bëhet për qëllime kriminale, mirëpo janë edhe një sërë faktorësh tjerë. Statistikat tregojnë se më tepër janë përdorë armë zyrtare në vrasje e në plagosje se sa armatim i dhënë me leje dhe qe qytetari është pajisur në mënyrë të rregullt”, thotë Kajtazi.
Për dënime më të ashpra ndaj përdoruesve të armëve pa leje, është edhe eksperti tjetër i sigurisë, Selam Shkodra.
“Me ndryshimet të kodit penal të fundit është ashpërsuar masat, e njeh edhe burgin me dënim efektiv por besoj që IKD është dashtë ta spjegojë që kanë qenë ndoshta kryerësit për shkak të procesit që ka ardh më vonë në gjykatë, kanë qenë me kodin e vjetër. Unë mendoj që nëse janë recidivistë, duhet të jenë dënimet më të ashpra pse jo edhe me burg”, thotë Shkodra.
Sipas hulumtimit të IKD-së, çdo vit në Kosovë futen deri në 1,300 armë të reja.
