Ish-ambasadori, Sylë Ukshini e ka quajtur lëvizje të vonuar të presidentes, Vjosa Osmani, dorëzimin e kërkesës për interpretim lidhur me pasojat juridike në rast të moskonstituimit të Kuvendit brenda afatit kushtetues prej 30 ditësh.
Ukshini në emisionin “Ditari” në Tëvë1 ka theksuar se dorëzimi kaq i vonshëm i kësaj kërkese tregon pavendosmëri, mungesë guximi dhe kalkulim personal nga ana e presidentes Osmani.
“Unë mendoj që kërkesa është e domosdoshme, por mendoj që lëvizja e presidentes është e vonuar pak në kuptimin se ideja që nga fillimi ishte çfarë pas 30 ditësh. Zgjatja apo pezullimi i këtij afati tregon në vetvete edhe një lloj pavendosmërie, edhe një lloj paguximi dhe njëkohësisht edhe një lloj kalkulimi të vet presidentes në këtë situatë krize”, është shprehur ai.
I pyetur se për çfarë kalkulimesh bëhet fjalë, Ukshini ka thënë se presidentja Osmani po mat situatën për të parë nëse e ka përkrahjen e Vetëvendosjes dhe Lidhjes Demokratike të Kosovës për një mandat të dytë në krye të shtetit.
“E mat situatën se a do ta ketë përkrahjen e VV-së për një mandat dhe a do ta ketë përkrahjen e LDK-së edhe një mandat. Do të thotë me sulmin që i bëri Avdullah Hotit dëshironte t’ia mirëmbante pozitën edhe Lumir Abdixhikut brenda partisë se ai shihet që nuk e pëlqen shumë Hotin”, ka thënë Ukshini.
