Këshilli Gjyqësor i Kosovës (KGjK) ka reaguar ashpër ndaj sulmit dhe kanosjes që i është bërë gjyqtarit mbikëqyrës të Degës në Drenas, pranë Gjykatës Themelore në Prishtinë, Shefqet Baleci.
Në një deklaratë për media, KGjK ka theksuar se veprime të tilla janë të papranueshme dhe përbëjnë një kërcënim serioz për sistemin e drejtësisë dhe sundimin e ligjit në vend.
“Çdo akt i tillë përbën jo vetëm një sulm ndaj gjyqtarëve, por edhe ndaj vetë themelimeve të shtetit të së drejtës,” thuhet në reagim.
Këshilli ka theksuar se garantimi i sigurisë së gjyqtarëve është element thelbësor për mbrojtjen e pavarësisë së gjyqësorit dhe një domosdoshmëri për luftimin e krimit dhe dukurive negative në shoqëri.
“KGjK shpreh mbështetjen e plotë për gjyqtarët në kryerjen e detyrave të tyre në mënyrë të pavarur, të paanshme dhe profesionale, në funksion të drejtësisë dhe interesit publik. Njëkohësisht, u bën thirrje organeve kompetente që të ndërmarrin masa të menjëhershme për hetimin e rastit dhe për të garantuar sigurinë dhe mbrojtjen e gjyqtarëve, në përputhje me obligimet kushtetuese dhe ligjore,” përfundon deklarata.
