Një aksident tragjik ka ndodhur sot në mbrëmje në rrugën magjistrale Prishtinë–Mitrovicë, në afërsi të fshatit Llazarevë, ku një këmbësor ka humbur jetën pasi u godit nga një veturë.
Rasti është konfirmuar nga zëdhënësi i Policisë për rajonin e Prishtinës, Agron Borovci, i cili bëri të ditur se viktima është një burrë rreth 53-vjeçar.
“Rreth orës 18:30 policia ka pranuar informatën se në rrugën magjistrale “Prishtinë – Mitrovicë” respektivisht në fshatin Llazarevë, ka ndodhur një aksident trafiku me fatalitet. Mbështetur në informacionet fillestare, në aksident kanë qenë të përfshirë, një këmbësor dhe një automjet dhe si pasojë, këmbësori, mashkull, rreth 53 vjeç, ka humbur jetën”, tha Borovci për Tëvë1.
Hetimet për zbardhjen e shkaqeve të aksidentit janë në zhvillim e sipër, ndërsa nuk janë dhënë ende detaje për drejtuesin e automjetit.
