Korporata Energjetike e Kosovës ka njoftuar se sistemi i elektrofiltrave në Termocentralin “Kosova A” është stabilizuar, pas një defekti të raportuar në orët e mëngjesit.
Sipas njoftimit të publikuar në Facebook, problemi ishte shkaktuar nga një ndërprerje në qarkun elektrik të ndërprerësve të kompresorëve të ajrit me automatizim.
Ndërkohë, kompania thekson se po zbaton masa parandaluese për të mbrojtur pajisjet tjera teknike dhe për të minimizuar çdo rrezik të mundshëm në sistemin energjetik.
“Paralelisht, janë duke u zbatuar masa intensive parandaluese me qëllim mbrojtjen e aseteve të tjera teknike dhe minimizimin e çdo rreziku potencial për sistemin.Korporata Energjetike e Kosovës mbetet e përkushtuar për menaxhim profesional të situatës, transparencë ndaj opinionit publik dhe rikthim sa më të shpejtë në operim normal, në përputhje me standardet teknike dhe mjedisore në fuqi”, thuhet në njoftimin e KEK-ut. /teve1.info/
