Përmes një komunikate për medie, KEK ka njoftuar se njësia B-2 ka realizuar remontin e rregullt vjetor në gusht të këtij viti.
Sipas korporatës, ky remont është bërë me pjesëmarrjen në inspektim në punët në turbinë nga ekspertët e kompanisë General Eletric (GE).
“Inspektimi ka rezultuar me disa të gjetura të cilat janë eliminuar. Remonti është bërë po ashtu nën mbikëqyrjen e ekipit të GE.
Për sigurinë e operimit të turbinës në njësinë B2, ekspertët e GE kanë rekomanduar kufizim të ngarkesës në operim, i cili pritet që të rritet pas aktivizimit të sistemit të ko-gjenerimit me 15 tetor”, thuhet në njoftim.
“KEK e ri-thekson se spekulimet e disa mediave lidhur me remontin e njësisë B2 nuk shkojnë në funksion të motivimit të punëtorëve të cilët tashmë kanë dëshmuar gatishmërinë e tyre dhe po bëjnë maksimumin në operimin e njësive prodhuese për të siguruar energji elektrike për qytetarët e vendit, andaj kërkojmë nga të gjithë palët që të mos bien pre e këtyre spekulimeve”, thuhet në komunikatën e KEK-ut.
