Korporata Energjetike e Kosovës ka reaguar pas një njoftimi të KEDS-it për ndërprerje të energjisë elektrike, ku si shkak ishte përmendur KEK-u.
Nga kjo korporatë kanë shprehur shqetësim, duke e quajtur një deklarim të tillë të pasaktë dhe keqinformues, i cili sipas tyre dëmton imazhin institucional të KEK-ut.
Në reagimin e saj, KEK ka sqaruar se roli i saj kufizohet vetëm në prodhimin e energjisë elektrike dhe se nuk ka përgjegjësi apo kompetenca në rrjetin e shpërndarjes apo në furnizimin e konsumatorëve të rregulluar.
Sipas tyre, për këtë arsye, KEK nuk mund të konsiderohet shkaktar i ndërprerjeve të energjisë në këto segmente.
Po ashtu, KEK ka kërkuar ndërhyrjen e Zyrës së Rregullatorit për Energji, duke i ftuar qytetarët që çdo faturë apo njoftim ku përmendet KEK-u si shkak për ndërprerje ta raportojnë pranë këtij institucioni.
Në fund, korporata i ka bërë thirrje ZRRE-së që ta trajtojë këtë çështje me seriozitet të plotë, në mënyrë që të mos keqinterpretohen përgjegjësitë institucionale dhe raste të ngjashme të mos përsëriten.
“Theksojmë qartë se KEK, si prodhues i energjisë elektrike, nuk ka asnjë kompetencë mbi rrjetin e shpërndarjes apo furnizimin e konsumatorëve të rregulluar, dhe në asnjë rrethanë nuk mund të jetë shkaktar i ndërprerjeve në këto segmente”, thuhet në reagim. /teve1.info/
