Nga e enjtja, bizneset që nuk kanë kontratë për furnizim me energji elektrike në tregun e lirë, pritet të përballen me shkyçje.
Si datë të fundit e kanë 30 korrikun.
Pa rrymë mund të mbesin të gjitha bizneset që kanë mbi 50 punëtorë ose mbi 10 milionë euro qarkullim, në rast se ato nuk kanë lidhur kontrata.
“ZRRE është duke monitoruar me kujdes zbatimin e këtij vendimi dhe zhvillimet në treg, ky vendim nuk mund të shtyhet, pasi zbatimi i tij përbën një obligim ligjor i cili nuk mund të shtyhet mbi baza të kërkesave të palëve të interesit”, kanë thënë nga ZRrE-ja
Se të premten do të fillojnë shkyçjet, e kanë konfirmuar edhe nga KEDS-i.
“Bazuar në këto obligime ligjore të përmendura më lart, KEDS nesër, më 31.07.2025, është i obliguar të shkyçë nga rrjeti të gjithë konsumatorët që aktualisht nuk kanë një marrëveshje të rregullt furnizimi me një Furnizues Aktiv. KEDS rikujton se ky proces është pjesë e reformave për liberalizimin e tregut të energjisë dhe është i përcaktuar nga autoriteti rregullator. Ne inkurajojmë bizneset që ende nuk kanë ndërmarrë këtë hap të kontaktojnë sa më parë furnizuesit e licencuar nga ZRRE për të përmbushur obligimet e tyre”, kanë njoftuar nga KEDS-i
E nga Dhoma e Tregtisë dhe Industrisë në Kosovë thonë se ky vendim po merret pa asnjë takim të ZRrE-së me bizneset.
Kushtrim Ahmeti nga kjo organizatë tregon se ka ende biznese të cilat i kanë lëndët në Gjykata kundër vendimit, dhe të cilat po presin përgjigje.
Ahmeti tregon se jo të gjitha kompanitë furnizuese, kanë bërë oferta për bizneset.
Kundër këtij vendimi janë edhe Oda Ekonomike e Kosovës.
Vendimi i ZRrE-së ka hyrë në fuqi nga 1 qershori. Nga ajo ditë, bizneset kanë pasur kohë 60 ditë për të lidhur kontrata me njërën nga kompanitë furnizuese për të kaluar në tregun e lirë.
