Instituti Demokratik i Kosovës (KDI) e ka cilësuar si absurde dhe të papranueshme situatën e krijuar rreth konstituimit të Kuvendit të Kosovës, duke theksuar se afati detyrues 30-ditor ka përfunduar pa u konstituuar institucioni ligjvënës.
Sipas KDI-së, brenda këtij afati Lëvizja Vetëvendosje (LVV) nuk e ka ushtruar të drejtën dhe përgjegjësinë për të propozuar kandidatin për kryetar të Kuvendit.
Instituti pretendon se edhe pas përfundimit të afatit, LVV-ja ka refuzuar ta paraqesë kandidaturën dhe ka kërkuar kohë shtesë, duke e konsideruar këtë si vazhdim të bllokadës institucionale.
KDI vlerëson se çështja tashmë ka tejkaluar mosmarrëveshjet politike ndërmjet partive dhe është shndërruar në një çështje të drejtpërdrejtë kushtetuese.
“Skadimi i afatit pa konstituimin e Kuvendit ka krijuar një çështje të drejtpërdrejtë kushtetuese për vlefshmërinë e procedurës së mëtejshme”, thuhet në reagimin e institutit.
Sipas KDI-së, një kandidaturë e paraqitur me vonesë, një ndërprerje e re 48-orëshe apo një marrëveshje politike nuk mund t’i eliminojnë automatikisht pasojat e mosveprimit brenda afatit të përcaktuar.
Instituti thekson se asnjë subjekt politik nuk mund t’i përcaktojë në mënyrë të njëanshme pasojat juridike të kësaj situate.
Për KDI-në, vendimi për interpretimin e Kushtetutës dhe përcaktimin e rrugës së mëtejshme i takon Gjykatës Kushtetuese.
Për këtë arsye, KDI kërkon që së paku dhjetë deputetë t’i drejtohen menjëherë Gjykatës Kushtetuese dhe të kërkojnë sqarim lidhur me veprimet e ndërmarra pas skadimit të afatit.
Në veçanti, KDI kërkon përgjigje nëse mosushtrimi brenda afatit i së drejtës për propozimin e kandidatit e ka shteruar mandatin e kësaj përbërjeje për përfundimin e procesit konstituues, çfarë vlefshmërie juridike kanë veprimet e ndërmarra pas skadimit të afatit dhe cila procedurë kushtetuese duhet të ndiqet më tej, përfshirë mundësinë e zgjedhjeve të reja.
Në përfundim, KDI thekson se Kosova ka nevojë për institucione të krijuara mbi bazën e një zgjidhjeje kushtetuese dhe jo për zgjidhje politike të improvizuara.
Sipas institutit, çdo hap i ardhshëm duhet të ketë bazë kushtetuese, në mënyrë që të shmanget krijimi i precedentëve që mund të rrezikojnë funksionimin e institucioneve të Republikës së Kosovës.
