Sipas KDI-së ky rast ka treguar problemet që janë në sistemin e drejtësisë dhe nevojën për reformim, por sipas tyre, qasja e Qeverisë është ndërhyrje në punën e gjyqtarëve dhe prokurorëve.
“Rasti i dhunimit të një 11 vjeçareje ka risjellë vëmendjen tek problemet me të cilat ballafaqohet sistemi i drejtësisë në Kosovë, ndër të cilat, mosndëshkueshmëria dhe trajtimi jo-serioz i lëndëve të ndjeshme janë më akutet. Ky rast edhe një herë ka rikonfirmuar nevojën për reformimin e sistemit të drejtësisë, në funksion të rritjes së nivelit të llogaridhënies dhe performancës së institucioneve të drejtësisë. Megjithatë, KDI konsideron se qasja e Qeverisë së Kosovës ndaj kësaj situate – duke kërkuar shkarkime dhe dorëheqje të akterëve të sistemit të drejtësisë, përbën ndikim në pavarësinë dhe punën e gjyqësorit. Kushtetuta e definon qartazi parimin e ndarjes, kontrollit dhe balancimit të pushteteve, andaj ndërhyrjet e Qeverisë në forma të tilla cenojnë standardet dhe parimet themelore të demokracisë kushtetuese. Për më tepër, legjislacioni parasheh mekanizma të llogaridhënies ndaj gjyqtarëve e prokurorëve, që janë aktualisht rruga e vetme për t’i thirrur në përgjegjësi të njëjtit lidhur me punën e tyre”, thuhet në komunikatën e KDI-së.
Sipas tyre në kohën kur vendi është në prag të inicimit të procesit të Vetting-ut në drejtësi, raportet mes institucioneve të drejtësisë dhe ekzekutivit janë tejet të rëndësishme në përmbylljen me sukses të një procesi kaq të ndjeshëm e kompleks, siç është Vetting-u.
“Prandaj, KDI bën thirrje që Qeveria të ndërpresë tendencat për ndërhyrje në punën e gjyqësorit, por në anën tjetër edhe KGJK-ja dhe KPK-ja të përdorin mekanizmat e nevojshëm disiplinor ndaj gjyqtarëve dhe prokurorëve në lidhje me trajtimin jo-adekuat të rasteve”, thuhet në komunikatë./teve1.info/
